Deu 3 | NdeIBE | STEP | Sasuka sasesiphenduka sakhwela njalo sisekele umgwaqo oya eBhashani, kanti u-Ogi inkosi yaseBhashani kanye lamabutho akhe wonke wayesihlangabeza ukuze alwe lathi e-Edreyi.

Deuteronomy 3

Ukunqotshwa kuka-Ogi inkosi yeBhashani

1 Sasuka sasesiphenduka sakhwela njalo sisekele umgwaqo oya eBhashani, kanti u-Ogi inkosi yaseBhashani kanye lamabutho akhe wonke wayesihlangabeza ukuze alwe lathi e-Edreyi. 2 UJehova uNkulunkulu wathi kimi, “Ungamesabi, ngoba sengimnikele kuwe lamabutho akhe wonke kanye lelizwe lakhe. Yenza kuye owakwenza kuSihoni inkosi yama-Amori, owayebusa eHeshibhoni.”

3 Ngakho uJehova uNkulunkulu wethu wanikela u-Ogi inkosi yaseBhashani lamabutho akhe wonke ezandleni zethu. Satshaya sababhuqa, asitshiyanga loyedwa kodwa lokhu.

4 Ngalesosikhathi sathumba wonke amadolobho akhe. Akusalanga dolobho lalinye esingalithumbanga phakathi kwawo wonke angamatshumi ayisithupha – umhlubulo wonke welizwe le-Agobi, ilizwe lika-Ogi eBhashani.

5 Wonke la amadolobho ayevikelwa ngemiduli ephakemeyo langemigoqo yokuvala amasango lemijabo yokunxiba, kanti njalo yayiminengi eminye imizi eyayingahonqolezelwanga ngemiduli yokuvikela. 6 Satshaya sabhuqa konke, kwaba njengalokhu esakwenza kuSihoni inkosi yaseHeshibhoni satshabalalisa wonke amadolobho – amadoda, abesifazana kanye labantwana. 7 Kanti-ke izifuyo zonke kanye lesakuthumba emadolobheni abo sazithathela kwaba ngokwethu.

8 Ngakho ngalesosikhathi kulawo makhosi womabili ama-Amori sathumba ilizwe elisempumalanga yeJodani, kusukela eziNdongeni zase-Anoni kuze kuyefika eziNtabeni zaseHemoni. 9 (IHemoni ibizwa ngokuthi yiSiriyoni ngamaSidoni, kanti-ke ama-Amori ayibiza ngokuthi yiSeniri.) 10 Sathumba wonke amadolobho emagcekeni, kanye lawo wonke eGileyadi, laseBhashani yonke kusiya eSalekha lase-Edreyi, engamadolobho ombuso ka-Ogi eBhashani. 11 (U-Ogi inkosi yaseBhashani nguye yedwa owayesesele emthonselaneni wamaRefa. Umbheda wakhe wawungowensimbi njalo umude okudlula izingalo ezilitshumi lantathu kanti ububanzi bawo buzingalo eziyisithupha. Wona ulokhu useRabha yase-Amoni.)

Ukwahlukaniswa kwelizwe

12 Phakathi kwelizwe esalithumbayo ngalesosikhathi, nganika abakoRubheni labakoGadi ilizwe elisenyakatho yase-Aroweri ngaseNdongeni zase-Anoni, kuhlanganisa lengxenye yelizwe lamaqaqa aseGileyadi, kanye lamadolobho akhona. 13 EleGileyadi lonke kanye lalo lonke eleBhashani, lombuso ka-Ogi, ngalinika abayingxenye yesizukulwane sikaManase. (Umhlubulo wonke welizwe le-Agobi ngaseBhashani lalisaziwa ngokuthi yilizwe lamaRefa. 14 UJayiri, owosendo lukaManase, wathatha sonke isiqinti esisukela emangweni we-Agobi kusiya emngceleni weGeshuri laseMuyakhathi; saba yisiqinti esabizwa ngaye, okokuthi lalamuhla sibizwa ngokuthi yiHavothi-Jayiri.) 15 IGileyadi ngayinika uMakhiri. 16 Kodwa abakoRubheni labakoGadi ngabanika isiqinti selizwe elisuka eGileyadi lisiya eziNdongeni zase-Anoni (phakathi laphakathi kwendonga kungumngcele) kusehla kusiya eMfuleni uJabhoki, ongumngcele wama-Amoni.

17 Umngcele wentshonalanga kuyiJodani ngase-Arabha, kusukela eKhinerethi kusiya eLwandle lwase-Arabha (uLwandle lweSawudo) ngaphansi ekwehleni okungapha ngePhisiga.

18 Ngalilaya ngalesosikhathi ngathi: “UJehova uNkulunkulu wakho ukuphile lelilizwe, lithathe libe ngelakho. Kodwa wonke amadoda asaqinileyo, ahlomele ukulwa, kumele achaphe kuqala phambi kwabafowenu abako-Israyeli. 19 Kanti-ke abafazi benu, abantwana lezifuyo zenu (ngiyazi lifuyile kakhulu) bangazihlalela emadolobheni engilinike wona,

20 kuze kuthi uJehova aphumuze abafowenu njengalokhu akwenzileyo kini, kanti labo njalo bazabe sebelithethe ilizwe abaliphiwe nguJehova wenu, ngaphetsheya kweJodani. Ngemva kwalokho, lonke ngamunye kuzamele libuyele eziqintini engilinike zona.”

UMosi walelwa ukuchapha iJodani

21 Ngalesosikhathi ngalaya uJoshuwa ngathi: “Usuzibonele ngamehlo akho konke uJehova wakho akwenze kulayana amakhosi amabili. UJehova uzakwenza khonokho kuzo zonke izizwe oya kuzo. 22 Ungazesabi lezozizwe, uJehova uNkulunkulu wakho uzakulwela yena uqobo lwakhe.”

23 Ngalesosikhathi ngacela kuJehova ngathi:

24 “O Nkosi Yobukhosi, usuqalisile ukutshengisa inceku yakho ubukhulu bakho lesandla sakho esilamandla amakhulu. Phela nguwuphi unkulunkulu ezulwini loba emhlabeni ongenza lokhu okwenzileyo lemisebenzi emikhulu oyenzayo? 25 Ngivumela ngiye khona ngiyebona ilizwe elingaphetsheya kweJodani – ilizwe elihle lamaqaqa kanye leLebhanoni.”

26 Kodwa ngenxa yenu uJehova wangithukuthelela akazange athande ukungizwa. UJehova uNkulunkulu wathi kimi, “Kwanele, ungabe usakhuluma kimi futhi ngalindaba. 27 Khwela phezu kwePhisiga ukhangele entshonalanga lasenyakatho leningizimu lasempumalanga. Ukhangele ulibone ngawakho amehlo ilizwe njengoba ungasoze uchaphe uJodani. 28 Kodwa beka uJoshuwa esikhundleni, umkhuthaze njalo umqinise, ngoba uzakhokhela lababantu abachaphise njalo uzakwenza balithathe lelolizwe ozalibona libe yilifa labo.” 29 Ngakho sahlala esihotsheni phansi kweBhethi-Phewori.